डडेलधुरा | सत्यसुदूर
सुदूरपश्चिम प्रदेशको डडेलधुरा जिल्लास्थित आलिताल गाउँपालिका–३ मा रहेको आलिताल प्राकृतिक सौन्दर्य, धार्मिक आस्था र जैविक विविधताले भरिपूर्ण एक महत्वपूर्ण प्राकृतिक ताल हो। यही तालको नामबाट आलिताल गाउँपालिकाको नामकरण गरिएको हो।
महाभारत पर्वत शृङ्खलाको फेदीमा समुद्री सतहबाट करिब ८०० मिटर उचाइमा रहेको यो ताल रङ्गुन जलाधार क्षेत्रमा पर्दछ। तालको लम्बाइ करिब १,१७५ मिटर र चौडाइ करिब ४०० मिटर रहेको छ। हरियाली वन, पहाड र शान्त वातावरणले घेरिएको यस क्षेत्रलाई सुदूरपश्चिमकै आकर्षक पर्यटकीय गन्तव्यका रूपमा हेरिएको छ।
आलितालको उत्पत्तिबारे रोचक जनश्रुति
स्थानीय जनविश्वासअनुसार अहिले ताल रहेको स्थान पहिले धान खेती हुने ठूलो फाँट थियो। एक महिलाले सपनामा अर्को दिन खेतमा धान रोप्न नजान चेतावनी पाएकी थिइन्। उनले गाउँलेलाई जानकारी गराए पनि कसैले विश्वास गरेनन्। अर्को दिन धान रोप्ने क्रममा ठूलो वर्षा भयो, खेत पानीले भरियो र विशाल ताल बनेको जनश्रुति छ। त्यसपछि उक्त स्थानलाई ‘आलिताल’ भनिन थालियो। स्थानीय धार्मिक विश्वासअनुसार भगवान शिवसँग पनि यो स्थान जोडिएको मानिन्छ।
पर्यटन विकासमा बढ्दो प्रयास
पछिल्ला वर्षहरूमा आलिताल क्षेत्रको संरक्षण, सरसफाइ र पर्यटन पूर्वाधार विकासमा गाउँपालिकाले सक्रिय रूपमा काम गरिरहेको छ। ताल क्षेत्रमा मन्दिर निर्माण, दृश्यावलोकन टावर, पदमार्ग, पार्क, विश्रामस्थल तथा अन्य पूर्वाधार निर्माण गरिँदै आएका छन्। भविष्यमा व्यवस्थित डुङ्गा (बोटिङ), पार्किङ, पिकनिक स्थल तथा अन्य पर्यटकीय सेवा विस्तार गर्ने योजना पनि अघि बढाइएको छ।
जैविक विविधताको केन्द्र
आलिताल वरपर घना वन, विभिन्न प्रजातिका चराचुरुङ्गी तथा वन्यजन्तु पाइने भएकाले यो क्षेत्र जैविक विविधताका दृष्टिले पनि महत्वपूर्ण मानिन्छ। प्रकृतिप्रेमी, पदयात्री तथा धार्मिक पर्यटकका लागि यो उपयुक्त गन्तव्य बन्न सक्ने सम्भावना रहेको विज्ञहरू बताउँछन्।
पर्यटनबाट स्थानीय अर्थतन्त्रमा टेवा
स्थानीयवासीका अनुसार प्रचार–प्रसार र पूर्वाधार अभावका कारण लामो समय ओझेलमा परेको आलिताल अहिले विस्तारै पर्यटकको रोजाइमा पर्न थालेको छ। संरक्षणसँगै होमस्टे, स्थानीय परिकार, हस्तकला तथा धार्मिक पर्यटनलाई जोडेर विकास गर्न सके आलितालले डडेलधुराको अर्थतन्त्रमा महत्वपूर्ण योगदान पुर्याउने अपेक्षा गरिएको छ।
Leave a Reply